احمدی نژاد نے شنگھائی تعاون تنظیم سے کہا ہے کہ وہ علاقے کی طاقت بنے

 مکمل صلاحیت رکھتے ہیں ، امریکہ ایران ایٹمی بحران کا حل نہیں چاہتا بلکہ معاملے کو الجھا رہا ہے

شنگھائی تعاون تنظیم کے سربراہی اجلاس میں شرکت کے بعد یہاں ایرانی صدر نے صحافیوں سے بات چیت کرتے ہوئے کہا کہ ایران کے جوہری پروگرام کے پرامن اور جامع حل کے لیے پورپی ممالک کی جانب سے پیش کردہ مراعاتی پیکج مثبت ہے تاہم پیکج میں کچھ ایسی تجاویز پائی جاتی ہیں جس پر ہمارے کچھ تحفظات ہیں

انہوں نے کہا کہ مراعاتی پیکج کا سوچ سمجھ کر مناسب وقت پر جواب دیا جائے گا جو ایرانی قوم کے مفاد سے متصادم نہ ہو

انہوں نے کہا کہ ہمارا ایٹمی پروگرام مکمل طور پر پرامن اور صرف توانائی کے مقاصد کے حصول کے لیے ہے ہم نے کئی بار عالمی برادری پر اپنا موقف ظاہر کیا ہے کہ تہران کا ایٹمی ہتھیار بنانے کا کوئی پروگرام نہیں ہے

نژاد نے کہا کہ اسرائیل ایٹمی ہتھیاروں کی تیاری کا پروپیگنڈہ رچا کر عالمی برادری کو ایران کے خلاف کرنا چاہتا ہے۔ انہوں نے کہا کہ یورینیم کی افزودگی ہمارا بنیادی حق ہے ایٹمی بحران کے حل کے لیے ہر کسی کے ساتھ مذاکرات کے لیے تیار ہیں یورینیم کی افزودگی روکنے کے لیے کسی سے بات نہیں ہوسکتی

اسرائیل سے متعلق ایک سوال کے جواب میں انہوں نے کہا کہ ایران کو اسرائیل سے کوئی خطرہ نہیں ہے تہران اسرائیل کی جانب سے ہر قسم کی جارحیت کا منہ توڑ جواب دینے اور اپنے دفاع کے لیے مکمل صلاحیت رکھتا ہے

انہوں نے کہا کہ شنگھائی تعاون تنظیم کے سربراہی اجلاس میں ایران کے معاملے پر مثبت بات چیت کی گئی ہے تمام سربراہان نے ایران کے جوہری بحران کے حل کے لیے بھرپور تعاون کی یقین دہانی کرائی ہے انہوں نے کہا کہ ایٹمی پروگرام سے متعلق ایرانی موقف کی حمایت پر چین اور روس کے شکر گزار ہیں