ہوجن تاؤ کا کہنا ہے کہ پاکستان میں ان کا شاندار استقبال کیا گیا

صبح سات بجے سکول پہنچنے کی ہدایات کی گئی تھیں جن کو وہاں سے آٹھ بجے انتظامیہ نے مقررہ مقامات پر پہنچانا شروع کیا، جہاں یہ بچے صبح نو بجے سے لیکر شام مغرب تک ڈیوٹی دیتے رہے

اس دوران سڑکوں پر موجود یہ بچے آپس میں کھیل کود میں بھی مصروف رہے، جبکہ انتظامیہ کی جانب سے انھیں کھانے پینے کے لئے دوپہر کو جوس ٴ بسکٹ ٴ چپس اور پیٹیز وغیرہ فراہم کئے گئے

 محکمہ تعلیم نے لاہور کے تمام سرکاری سکولوں میں گزشتہ روز عام تعطیل دے کر ان کے سربراہان کو سخت ہدایات جاری کر رکھیں تھیں کہ ہر طالب علم اور استاد چینی صدر کے استقبال کی تقریبات میں ضرور شامل ہو، اگر کوئی طالب علم یا استاد چینی صدر کے استقبال کی تقریبات میں شریک نہ ہوا تو اس بچے کو سکول سے خارج کر دیا جائے گا

جبکہ نہ آنے والے استاد کے خلاف سخت محکمانہ کارروائی عمل میں لائی جائے گی، تاہم اس تمام صورتحال کے باوجود بعض والدین نے انتظامیہ کی جانب سے اپنے بچوں کو خوار کئے جانے کے خوف سے چینی صدر کے استقبال کے لئے نہیں بھیجا

والدین کا کہنا تھا کہ ہمارے معصوم بچے تمام دن سڑکوں پر کھڑے ہونے کے متحمل نہیں ہیں

ان کا کہنا تھا کہ ماضی کی بہت سی مثالیں اس بات کی گواہ ہیں تاہم بچوں کی اکثریت گزشتہ روز چینی صدر کے استقبال کے لئے موجود تھی بلکہ بعض اساتذہ تو اپنے چھوٹے بچوں تک کو پکنک کے بہانے اپنے ساتھ لیکر آئے تھے لیکن جب انھیں شام دیر تک وہاں موجود رہنا پڑا تو وہ خود کو اس غلطی پر کوستے رہے